我的網誌清單

2016年9月9日星期五

香蔥糯米飯

早上醒來,感到一點點嘅秋意,突然好想食糯米飯。
拿拿林去浸糯米,準備晚餐用,仲浸咗幾隻香菇。
屋企冇臘腸,我用咗德國鮮肉腸代替,先將肉腸煎熟,放涼一點,切粒。


原鑊內加多少少油,中火炒炒香菇粒,我今日仲加咗啲蝦皮一齊炒,經濟之餘又香啲。


跟住將糯米隔水,倒入去一齊炒,見鑊底開始乾,就加少少浸冬菇水/水,然後再炒炒。


幾分鐘後,可以加入香腸粒,繼續炒。


一直加水同炒,直至糯米開始黏在一起,變得重身,夠熟,便可以加點糖,生抽同老抽,炒勻。


再加入大部份嘅蔥花,炒一分鐘左右,熄火,盛起,灑上餘下嘅蔥花。


是日晚餐,王子見到有糯米飯食,好開心呢。


減磅王子依家餐餐食飯前,先來一碗素湯。


蕹菜炒蠔菇,蕹菜係自己種㗎。


糯米飯真係好好味,有人即刻要求留啲俾佢帶lunch。
咁鍾意食,過幾日再整多次吧。。。


19 則留言:

  1. 炒糯米飯好嘥時間,我通常蒸熟才撈其它炒過的配料…
    而你個邊都有通菜?聽講天氣要夠熱同多雨水至種得好喎?

    回覆刪除
    回覆
    1. 我覺得ok喎,通常十多分鐘已經炒好
      其實我哋夏天係夠熱種到通菜架,今日都有成30度呢

      刪除
  2. 我都係用你這個方法,但會先用熱水沖一沖先(睇電視學的)。不過我懶,因為會炒到隻手好攰,嘻嘻!但你咁樣煮係最好食。

    回覆刪除
    回覆
    1. 我其實仲有另一個方法,都係用到熱水嘅,係一個快好多嘅方法,下次我再炒糯米飯時分享下

      刪除
  3. 回覆
    1. 煮啦,糯米補身,啱秋天食,而且我發覺,啲洋人都好鍾意食呢樣嘢

      刪除
  4. 回覆
    1. 其實如果方法啱,都唔使炒好耐咋

      刪除
  5. 生炒糯米飯有時會炒到手破, 我好鬼懶, 通常煲熟咗先抄..HAHA

    回覆刪除
    回覆
    1. 我其實識得另一個方法,會快好多,有機會分享下

      刪除
  6. 用德國腸同用蠟腸出來味道會否有不同?

    回覆刪除
    回覆
    1. 香氣上會唔一樣,同埋臘腸就甜啲,風乾嘅香氣重啲,德國腸就有肉味,而且啲肉汁會滲咗落啲飯度,而且我覺得德國腸會健康過臘腸

      刪除
  7. 生炒糯米飯好好味,但好攰喎,而且要好好手勢,
    仲要睇到實,分分鐘焦哂,妳真掂!
    依家酒摟好少做,好懷念

    糯米喺泰國出品?

    回覆刪除
    回覆
    1. 其實如果方法啱,知道啲小秘訣,就唔難㗎啦
      不過呢個點都真係要啲時間煮,所以酒摟要做成本都好高
      係呀,糯米係泰國出品,我哋好易買到

      刪除
  8. 炒到手都軟,好味又有人欣賞,抵曬

    回覆刪除
    回覆
    1. 其實如果方法啱,知道啲小秘訣,都好快手可以炒完一大碗,唔會手軟㗎

      刪除
  9. 我都試過生炒, 不過燶底, 所以現在用電飯煲煮完再拌勻, 不過覺得無咁好食.

    回覆刪除
    回覆
    1. 係呀,唔一樣㗎,真係要生炒先至好食㗎,我其實識一個快好多嘅方法,下次我再炒糯米飯時分享下

      刪除