病人餐

病到天昏地暗。
今次啲菌超勁，真攞命，搞到我周身骨痛，又咳又狂包雲吞，成個人霉哂。
仲病到個口苦哂，食乜都無味。。。
王子立即home office，照顧我。
咁都要食架，呢啲時候，超懷念香港嘅方便，落街買外賣就得啦。
呢度，外賣少又唔近，啲外賣又唔啱病人食，用糧倉快啲囉。
我無胃口啫，胃口呢家嘢，王子日日都有。

知道上次post味醂一夜干，很多blog友睇唔到，今次再post做法。

將魚劏好，洗淨，厚肉嘅將佢中間切開，薄啲方便入味。
魚印乾水，用100g醬油、200g味醂，加入2-3湯匙糖，試味，與1-1.2kg魚拌勺，等3-4個鐘。
吊起風乾一晚至大半日，便有味醂一夜干食啦。

味醂一夜干，可以烤，可以用易潔鑊不加油煎。

是日食味醂一夜干樽魚。
仲有大大嘅野菜味噌湯。

仲有南瓜栗子飯。